Дар нуҳ моҳи соли 2024 ба дастгоҳи Хадамоти муҳоҷират ва зерсохторҳои он  24 989 нафар шаҳрванд, аз ҷумла 23 931 нафар шифоҳӣ, 121 нафар хаттӣ ва 937 нафари он бо телефони боварӣ муроҷиат намуданд. Вобаста ба муроҷиати 6018 нафар мард ва 832 нафар зан, ба 2282 нафар тавсия ба касбомӯзӣ ва ба 1422 нафар тавсия барои ҷойи кор дар дохили кишвар дода шуд. Дар натиҷа 1134 нафар дорои касб гардида, 390 нафар дар дохили кишвар бо ҷойи кор таъмин карда шуданд.

Ҳамзамон, ширкатҳое, ки иҷозатнома барои ҷалби қувваи кории хориҷӣ ба ҷумҳурӣ доранд, дар баробари ҷалби шаҳрвандони хориҷӣ бояд таносуби бокортаъминкунии шаҳрвандони ватаниро риоя намоянд ва дар давраи ҳисоботӣ 41 655 нафар дар ин ширкатҳо бо кор таъмин шуда, фаъолият карда истодаанд, (дар 9-моҳаи соли 2023-38 598), ки нисбат ба ҳамин давраи соли гузашта 3057 нафар теъдоди кормандони маҳаллӣ зиёд мебошад.

Таҳлилҳо нишон медиҳанд, ки теъдоди кормандони хориҷӣ дар корхонаҳою ташкилотҳо 4527 нафар ва шумораи кормандони маҳаллӣ бошад 41 655 нафар буда, таносуб дар ин ширкатҳо ба ҳисоби миёна 9,8% бар 90,2%-ро ташкил додааст. Бо мақсади бо кор таъмин намудани муҳоҷирони меҳнатӣ дар хориҷа, айни ҳол дар ҷумҳурӣ 50 субъекти хоҷагидор дорои иҷозатномаи Хадамоти муҳоҷират буда, барои интиқол додани қувваи корӣ ба хориҷи кишвар машғул мебошанд.

Бояд қайд кард, ки аз шумораи умумии субъектҳои интиқолдиҳандаи қувваи корӣ 30- то субъекти хоҷагидор тавонистааст, ки дар 9-моҳи соли 2024 ба 19 кишвари ҷаҳон 13 787 нафар (9-моҳи соли 2023-3595 нафар) муҳоҷирони меҳнатиро муташаккилона ба хориҷи кишвар сафарбар намуда, бо ҷои кор таъмин гардониданд, ки нисбат ба 9 моҳи соли 2023-10 192 нафар зиёд мебошад. Дар баробари ин, айни замон корбарӣ бо ширкатҳои Туркия, Қатар, Амороти Муттаҳидаи Араб, Лаҳистон, Литва, Латвия ва Олмон дар асоси шартномаҳои тарафайн идома дошта, тибқи талаботи корфармоён омодакунии муҳоҷирон барои интиқоли муташаккилона шуруъ гардид.

Бо мақсади гуногунсамтии (диверсификатсия) муҳоҷирати меҳнатӣ бо ташаббуси вазорат лоиҳаи созишномаҳои байниҳукуматӣ бо Белгия, Иёлоти Муттаҳидаи Америка, Канада, Лаҳистон, Латвия, Олмон, Сингапур ва Япония оид ба танзими қувваи корӣ таҳия ва унвонии ниҳодҳои дахлдори кишварҳои болозикр ирсол карда шуда, якҷо бо ниҳодҳои дипломатии кишвар мавриди пайгирӣ қарор доранд.

То охири моҳи сентябри соли 2024 дар асоси ариза ба 4737 нафар (2023-5258 нафар) шаҳрванди хориҷӣ иҷозат барои кор ба барасмият дароварда шуд. Дар нуҳ моҳи соли равон ба Намояндагии Вазорат дар Федератсияи Россия оид ба муҳоҷират 22137 (дар 9 моҳи соли 2023 – 12 229 нафар) муроҷиату дархости муҳоҷирони меҳнатӣ ворид гардида, мавриди корбарӣ қарор дода шуданд.

Бо мусоидати Намояндагӣ ва дастгирии диаспораҳои тоҷик ба муҳоҷирони меҳнатии эҳтиёҷманд дар Федератсияи Россия ба 53 нафар ба маблағи қариб 3 млн. рубл (дар 9 моҳи соли 2023,  ба 68 нафар ба маблағи 2,1 млн.рубл) кумакҳои моддӣ расонида шуда, дар ҳамкории доимӣ бо мақомоти дахлдори Федератсияи Россия 30,5 млн. рубли нопардохтшудаи музди меҳнати муҳоҷирон, аз ҷониби корфармоён ва шахсони воқеӣ ба муҳоҷирони меҳнатӣ баргардонида шуд.

Илова ба ин, 1774 нафар муҳоҷири меҳнатӣ бо кор таъмин шуда, 62 вохӯриву мулоқотҳо бо мақомоти қудратии ФР (Сарраёсати кор бо муҳоҷиратии ВКД Россия, прокуратура, суд, шуъбаҳои полис, Кумитаҳои тафтишотӣ, марказҳои нигаҳдории шаҳрвандони хориҷӣ) ва ташкилоту созмонҳои байналмилалӣ, 201 вохӯриву мулоқот бо муҳоҷирони меҳнатӣ ба мақсади тақвият бахшидани корҳои иттилоотӣ, ҷиҳати тавсия ва машваратҳои ҳуқуқӣ оид ба раванди қонунигардонии муҳоҷирони меҳнатӣ-шаҳрвандони ҶТ, ки ғайрирасмӣ,  яъне бе ҳуҷҷатҳои қонунии будубош, дар қаламрави ФР қарор доранд, 423 вохӯрӣ ва тамоси маҷозӣ бо ташкилотҳои ҷамъиятии тоҷикон, диаспораҳо ва 173 вохӯрӣ бо максади пешгири намудани шомилшавии муҳоҷирони меҳнатӣ ба гурӯҳҳои экстремистӣ ва ифротгароӣ гузаронидаст.

Дар нуҳ моҳи соли 2024 ҷиҳати иҷрои қарори Ҳукумати Ҷумҳурии Тоҷикистон аз 3 декабри соли 2021, №518 «Дар бораи тартиби амалӣ намудани муҳоҷирати дохилии аҳолӣ аз ноҳияҳои камзамин ва сераҳолии кӯҳистон ба водиҳои дорои заминҳои бекорхобидаи ҷумҳурӣ дар солҳои 2022-2024» дар ҳудуди шаҳри Исфара 15 оила, дар ҳудуди ноҳияҳои Ҷ. Балхӣ 20 оила, Шамсиддини Шоҳин 20, Рашт 35, аз шаҳри Роғун ба ноҳияи Файзобод 16, аз шаҳру ноҳияҳои ҷумҳурӣ ба ноҳияи Хуросон ба 140 оилаи кӯчонидашаванда, дар маҷмӯъ, ба 246 оила қитъаи замини наздиҳавлигӣ ҷудо гардидааст, ки ин 82%-и нақшаи солонаро ташкил медиҳад. Ба 71 сардори оилаи муҳоҷирони дохили шаҳри Исфара 355 000 сомонӣ қарзи имтиёзнок тибқи муқаррарот тавассути сохторҳои КВД “Бонки амонатгузории Ҷумҳурии Тоҷикистон “Амонатбонк” дар шаҳру ноҳияҳои болозикр барои пардохт интиқол дода шуд.

Дар ин давра мутобиқи қарори Ҳукумати Ҷумҳурии Тоҷикистон аз 17 феврали соли 2024, №69 “Дар бораи нақшаи миёнамуҳлати муташаккилона кӯчонидани муҳоҷирони экологӣ барои солҳои 2024-2026” аз ҷониби мақомоти иҷроияи ҳокимияти давлатии шаҳрҳои Кӯлоб ба 3 хоҷагӣ, Панҷакент 6, ноҳияҳои Шуғнон 1, Рӯшон 9 хоҷагӣ, Зафаробод 47 хоҷагӣ, Ашт 2 хоҷагӣ, Ш.Шоҳин 10 хоҷагӣ, Балҷувон 15, Сангвор 5, Восеъ 10 хоҷагӣ, ва Темурмалик 6 хоҷагӣ дар маҷмуъ ба 114 хоҷагӣ қитъаи замини наздиҳавлигӣ ҷудо гардид, ки 65%-и нақшаи солонаро ташкил менамояд.

Ҳамзамон, ҷиҳати иҷрои банди 6-и қарори Ҳукумати Ҷумҳурии Тоҷикистон аз 20 январи соли 2009, №47 «Дар бораи аз минтақаи зериобмонии НБО Роғун кӯчонидани аҳолии шаҳри Роғун ва ноҳияи Нуробод» вобаста ба пешниҳод намудани рӯйхати хоҷагӣ ва оилаҳои аз минтақаҳои зериобмонии НБО Роғун дар соли равон кӯчонидашаванда унвонии мақомоти иҷроияи ҳокимияти давлатии ноҳияи Нуробод 8 январи соли 2024, №4/9-48 мактуби расмӣ ирсол карда шудааст.

Масъалаи мазкур мавриди таҳлил ва баррасии мақомоти иҷроияи ҳокимияти давлатии ноҳияи Нуробод қарор дошта то ин ҷониб рӯйхати хоҷагӣ ва оилаҳои аз минтақаҳои зериобмонии НБО Роғун кӯчондашванда пешниҳод нагардидааст.