Тоҷикӣ
Русский
English
Вазорати меҳнат, муҳоҷират ва шуғли аҳолии Ҷумҳурии Тоҷикистон дар ҳамоҳангӣ бо мақомоти иҷроияи ҳокимияти давлатии вилоятҳо ва шаҳру ноҳияҳо дар робита ба иҷрои банди 44 Ҷадвали баргузории ҷашну солгард, фестивалу намоиш, иду озмунҳои фарҳангӣ, маърифатӣ, анъана ва ҳунарҳои мардумӣ дар Ҷумҳурии Тоҷикистон барои соли 2025, ки бо Амри Президенти Ҷумҳурии Тоҷикистон аз 2 январи соли 2025, №АП-713 тасдиқ шудааст ва банди 29 Нақшаи чорабиниҳо оид ба амалисозии “Барномаи рушди ҳунармандӣ дар Ҷумҳурии Тоҷикистон барои солҳои 2021-2025” (қарори Ҳукумати Ҷумҳурии Тоҷикистон аз 28 октябри соли 2020, №570) рӯзи 27 ноябри соли ҷорӣ дар Муассисаи давлатии “Осорхонаи миллии Тоҷикистон” Озмуни ҷумҳуриявии “Ҳунарманди сол - 2025” – ро баргузор намуд.
Озмуни ҷумҳуривии “Њунарманди сол – 2025” бо ҳузури намояндагони вазорату идора ва шахсони масъули мақомоти иҷроияи ҳокимияти давлатии шаҳру ноҳияҳои ҷумҳурӣ зимни суханҳои табрикотии муовини Сарвазири Љумњурии Тољикистон муҳтарам Дилрабо Мансурї вазири меҳнат, муҳоҷират ва вазири меҳнат, муҳоҷират ва шуғли аҳолии Ҷумҳурии Тоҷикистон Холмаҳмадзода Солеҳа оғоз гардид. Аз ҷумла, қайд карда шуд, ки Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар қатори роҳнамоиву созандагиҳои фарҳанги миллӣ, ҳамчун таҷассумгари ҳуввияти миллати эҷодкори мо, ташаббускори асосии эҳё ва рушди ҳунарҳои миллии тоҷик мебошанд. Аз нав зинда кардан ва рушд додани анъанаву суннатҳои волову наҷиби халқамон ва дар ин радиф такя ба ҳунарҳои мардумӣ намудан далели худшиносӣ миллӣ мебошад.
Мақсади баргузории озмун рушди фаъолияти ҳунармандӣ, ҳифз ва нигаҳдории мероси ғайримоддии фарҳангӣ, тарбияи ҳисси зебоипарастӣ, хештаншиносӣ, ҳунармандӣ ва ватандӯстӣ, эҳёи анъанаҳои аҷдодии ҳунарҳои мардумӣ ва оммавӣ гардонидани суннатҳои беҳтарини ҳунарҳои мардумӣ, тарғиби таҷрибаи пешқадами ҳунармандони варзида, муаррифӣ кардани намудҳои гуногуни маҳсулоти ҳунармандӣ ва дастгирию ҳавасмандгардонии ҳунармандон мебошад.
Дар даври ниҳоии озмуни мазкур ғолибони сатҳи ноҳиявӣ ва шаҳру вилоятии Озмуни ҷумҳуриявии “Ҳунарманди сол – 2025” аз ВМКБ, вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ аз рӯйи 5 номинатсия - “Нонпазӣ”, “Чакандӯзӣ”, “Атласбофӣ”, “Кулолгарӣ” ва “Кордсозӣ”, намунаи ҳунарҳои худро ба ҳайати васеи тамошобинон ва аъзои ҳакамон пешниҳод намуданд.
Дар маросими ҷоизасупории озмуни мазкур, муовини Сарвазири Ҷумҳурии Тоҷикистон Дилрабо Мансурӣ, вазири меҳнат, муҳоҷират ва шуғли аҳолии Ҷумҳурии Тоҷикистон Холмаҳмадзода Солеҳа, муовини якуми вазири меҳнат, муҳоҷират ва шуғли аҳолии Ҷумҳурии Тоҷикистон Каримзода Насим, директори Муассисаи давлатии “Осорхонаи миллӣ”-и Дастгоҳи иҷроияи Президенти Ҷумҳурии Тоҷикистон Иброҳимзода Зафаршо, роҳбарияти вазорату кумитаҳо, мақомоту идораҳо иштирок намуда, аз рӯи панҷ номинатсия “Нонпазӣ; “Чакандӯзӣ”; “Атласбофӣ”; “Кулолгарӣ” ва “Кордсозӣ” аз ҷониби Вазорати меҳнат, муҳоҷират ва шуғли аҳолии Ҷумҳурии Тоҷикистон ғолибонро бо ҷоиза, диплом ва туҳфаҳо қадрдонӣ карданд. Инчунин, ба намояндагони вазорату кумитаҳо ва мақомоти иҷроияи ҳокимияти давлатии вилоят ва шаҳру ноҳияҳои ҷумҳурӣ, ки дар Озмуни ҷумҳуриявии “Ҳунарманди сол – 2025” иштироки фаъолона доштанд бо сипоснома ва ифтихорномаҳои Вазорати меҳнат, муҳоҷират ва шуғли аҳолии Ҷумҳурии Тоҷикистон сарфароз гардонида шуданд.
Фотогалерея
Сомонаҳои мақомоти давлатӣ
