2 апрели соли 2025 вазири меҳнат, муҳоҷират ва шуғли аҳолии Ҷумҳурии Тоҷикистон Холмаҳмадзода Солеҳа бо Сафири Ҷумҳурии Корея дар Ҷумҳурии Тоҷикистон Ҷонг Сонг Шик вохӯрӣ баргузор намуд. Зимни вохӯрӣ ҷонибҳо рафти иҷрои муқаррароти Ёддошти тафоҳум байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Вазорати шуғл ва меҳнати Ҷумҳурии Корея оид ба фиристодан ва қабули кормандон тавассути низоми иҷозати кор аз 31 октябри соли 2024-ро баррасӣ намуданд. 

Ҷонибҳо бо қаноатмандӣ аз ҳамкориҳои судманд ва назаррас ҷиҳати интихоб гардидани Ҷумҳурии Тоҷикистон ҳамчун кишвари 17-ум ба низоми иҷозат барои шуғл (EPS), таъсиси Маркази EPS дар шаҳри Душанбе, ташкили курсҳои омӯзиши забони кореягӣ ва касбу ихтисосҳои ҷавобгӯ ба талаботи бозори меҳнати Корея изҳори миннатдорӣ намуданд. Таваҷҷуҳи хосса ба гуногунсамтии муҳоҷирати меҳнатӣ, омода ва  сафарбар намудани мутахассисони соҳибмалака ва донандаи забони кореягӣ, ки яке аз талаботҳои асосӣ ва ҳатмии низоми EPS маҳсуб меёбанд, зоҳир гардида, ҷонибҳо аз ташаббусҳои минбаъда, ки барои рушди муносибатҳои дуҷониба саҳмгузор хоҳад буд, умедворӣ карданд.  

Пас аз вохурӣ вазири меҳнат, муҳоҷират ва шуғли аҳолии Ҷумҳурии Тоҷикистон ва Сафири Ҷумҳурии Корея дар Ҷумҳурии Тоҷикистон дар маросими кушодавии нахустин курс аз рӯи ихтиссоси “Кафшергар” барои 35 нафар шаҳрвандони кишвар, ки аз мусоҳибаи  EPS гузаштаанд, дар МД “Маркази рушди ҳунармандӣ ва малакаҳои касбии муосир” иштирок намуданд. Инчунин, ҳайати мазкур бо ҷараёни таълими омӯзиши забони кореягӣ ва ихтисоси “Кафшергар” шинос шуда, дар хусуси  аҳамияти муҳим доштани ташаббуси мазкур бо касбомӯзон мубодилаи афкор намуданд. Дар натиҷа ҷонибҳо омодагии худро барои тақвияти ҳамкориҳои минбаъда, омода намудани шаҳрвандони кишвар тибқи талаботи низоми EPS ва роҳандозии сафарбаркунӣ ба Корея дар соли 2025 на танҳо аз рӯи ихтисоси кафшергар, балки дигар соҳаҳои ҷавобгӯ ба талаботи бозори меҳнати Корея иброз доштанд.